Pudu Laimi umnak misual nih an inn an boh i tangka an fir piak hna

Pudu Laimi umnak misual nih an inn an boh i tangka an fir piak hna
___________________________________________

Malaysia Laimi tampi an umnak Pudu ah August 9, 2019 zing sml 10:00 hrawng ah khan misual damiah nih Laimi umnak inn khan 5 an boh i an ngeihmi tangka vialte an fir piak dih hna.

Inn ngeitu nih an chimnak ahcun floor pakhat ahhin inn khan 7 a um i khan khat cu a lawng. Khan 6 ah minung kan um dih. Zing ahhin riantuan cio kan si tikah a hnubik ah a kal tawnmi hi ka fa le zing sml 9:10 ahhin sianginn kai ah an kal. Inn an boh hnu i kan theih kan hmuh hi zing sml 10:30 hrawng ah a si tiin inn boh piak a tongmi pakhat nih a chim.

Misual nih inn an boh piak hna hi Pu Tin Lian Uk ( Aibur ), Pu Chan Uk Thang ( Hmawngtlang ) Pu Tluang Tin Thang ( Haiphai ) Pu Van Thawng Ceu ( Hakha ) Pu Thiang Za Bik ( Hmawngtlang ) hna an si. Inn tang ah a ummi Nepal pa innkhan pakhat zong an boh piak ve i RM – 450 hrawng an lak piak ve.

Inn khan 6 ah a ummi chung ah inn 5 an boh. Inn khan pakhat ah chungkhar kharkhat cio an um hna. Chungkhar 5 tangka kha an fir dih. Misual damiah nih an dihlak tangka an fir piak mi hna hi RM – 7000 nak tlawm lo a si tiah Inn bok piak a tongmi Pu Van Thawng Ceu nih a chim.

Damiah nih an inn an boh ningcang cu zapi an inn bawmmi luhnak innka tawh ( key ) cu tha tein ai ong ko. Tha tein an rak on khawh ko. A sinain inn khan cio ah kutka hrenh mi cu an rak boh dih, an rak kalh dih. Inn chung thilri bizu, sutkhet vialte an rak leh dih i cuticun an rak kaltak.

Inn khan a boh tu hi minung tam pah dawh an si. Minung 3 in a cunglei cu an si lai tiah an zumh. A ruang cu inn khan mah tluk tawh tha tein kan hrenh i mah zat inn khan vialte an boh tikah hin minung 3-4 cu an si lai tiah inn ngeitu hna nihcun an zumh.

Pudu hrawng hi damiah nih inn an boh ti a um pah lengmang caah Pudu hrawng a ummi nih ralring tein kan um cio a herh.

Inn an bohnak hi Pudu Sabudi an zuarnak pawng te ah khan a si.

(CYOM)