Malaysia Chinmi Cheukhat Caah Thawngpang Tha

Malaysia Chinmi Cheukhat Caah Thawngpang Tha,

=================================

Malaysia ah aphan thar mi Chinmi cheukhat caah thawngpang tha ngai a si. UN card sawk nak ding caah website a ser piak hna i UN card sawknak caah appointment lak khawh nak website in rak sok mi cheukhat pawl cu a tuhi UN nih an pehtlaih pah thluahmah cang hna. Malaysia hrambunh a simi CRC nih a tanglei bantukin thawng a thanh>>>

UNHCR Maivan Kong Thawngpang!!

UNHCR nih nai te 02 December 2019 ah zung luhnak ding appointment laaknak ding caah maivan an rak sermi cu atu tawlrel hram an thok cuahmah cang. Kanmah CRC nih tawlrel piakmi chungin zei maw zat cu chawnh le appointment peekmi zong an um cang tiah thawng kan theih.

Hi kong he pehtlai in CRC nih kan member hna sinah thawng thanh kan in duhmi hna cu:
1. Nan phone peekmi kha felfai tein tlaih khawh i zuam ding a si lai. Cakuat (SMS) zong zoh/check lengmang ding a si lai.

2. Gmail nan peek a si ahcun nan gmail kha fel tein zoh lengmang khawh i zuam ding a si lai. (Gmail nan peek lo ahcun phone in an in chawnhbiak ko hna lai)

3. UN soknak kong he pehtlai in cakuat (or) phone chawnh nan don sual ahcun nanmah le community cio ah thawng thanh khawh le ruahnak hal khawh kan i zuam hna lai.

* UN soknak na tuah ko nain chawnh le cakuat na ton rih lo zongah na thinphang hlah. A sok ciomi minung kan tam tuk caah kum tling lo, nu hmei, dam lo le anmah nih bawmh a herh deuh ko tiah an ruahmi hna kha duhsah tein an auh cuahmah lio hna a si caah lungsau tein aho paoh nih hngah khawh i zuam hna usih.

Siaherhnak he,
CRC