Dr. Awng Myint Thang Chim Duhnnak Cu ” Mi Dam Lo Le Chimh Ngailo Mi Fa Poah Cu Pathian Thlachuah A Si Rua Lo”

Dr. Awng Myint Thang Chim Duhnnak Cu ” Mi Dam Lo Le Chimh Ngailo Mi Fa Poah Cu Pathian Thlachuah A Si Rua Lo”

==============================================================

Dr. Aung Myint Thang nih nizan ah “Fa tampi a ngeimi nu le pa cu chuahchan ngei bak lomi an si. Vawlei hi an caah harnak lawngte asi.” a tial i mi tampi a buai ter ngai hna. Nihin cu Fa le kong  a tial than i, Damlonak a ngei mi  le Chimh a ngailo mi Fa poah cu Pathian thlachuah mi Fa le an si lo tiah a ti than. Nang zeitin na ruah ve a tial mi hi rel ve hmanh>>> A tanglei hi a tial ning cu a si.

AFIMMI LE ATTHAMI FA LAWNGLAWNG HI NU LE PA CAAH THLUACHUAH DIK CU AN SI

(Ca a rel dih lomi le ai biatak lomi nih comment ah a tel in i tel hlah uh)

Psalm 128 ah “Fale cu Pathian sin in kan hmuhmi thluachuah an si” a ti caah fale vialte hi nu le pa caah thuachuah an si dih tiah Laimi Khrihfa nih kan ruahmi hi kan palh cikcek! Zei ruangah?

1. NU LE PA AHREMTU LE ATHATTU FALE HNA AN UM

Pathian nih a kan peekmi fale ahhin nu le pa lunglomhtertu fale lawngte an si dih loh. Nu le pa caah tthathnemnak a chuahpitu lawngte an si dih lo. An chuah bakin an tar tiang nu le pa caah phurhrit asi mi fale tampi an um ve. Pakhat pa cu a pa a thih hnu in a nu he an umtii i a nu kha a vuak (velh) lengmang. A nu kha nu le tuah in a tuah lo. A nu nih inn dang ah a zaam taak tawn. Ahnu ahcun a nu nih a celh ti lo i khua dang ah a um taak. A nu a thih tiang a fapa he an i chawn ti lo. A fapa zong nih a nu kha a thih lai hmanh ah phone hmanh in a chawn ta lo. Cucu a nu caah thluachuah a si kha hnga maw? Pakhat pa nih a pa cu a thah bak. Cu pa cu teh a nu le a pa caah thluachuah cu a si kho hnga maw? “Asi ko” nan ti ahcun Laimi cheukhat nih “thluachuah” nan timi hi ttiha nung taktakmi khi a si hnga!

2. CHUAHKA IN THIH TIANG A NGAWRMI FA HNA AN UM

Kum 18 ka si lio ah a si. Hakha peng khua pakhat ah Thawngttha chim ah ka rak vaak. In pakhat ah mi dam lomi an um an ti caah thlacam piak ah ka va leng hna. Nutung pa khat a rak um. A pawng ah chuah ka in a tho kho lomi, a tthu kho lomi, fapa pahnih a pawng ah an rak it ko. Faphir an si i kum kul an rak si cang. Kum kul chung a nu nih an zun le an eek a fim hna. Ka nu ka pa ti zong an thiam lo. Leng zong an chuak kho bal lo. Cu hna pahnih cu a nu le a pa caah thluachuah an si ko hnga maw? Harsatnak petu lawngte bak khi an si? An nu le an pa cu harsatnak an peek taktak hna.

3. SEHTAN RALKAAP A TTUANMI FALE HNA AN UM

Pathian thluachuah ngaingai ah kan ruahmi fale tampi cu nu le pa caah ral, u le nau caah ral a si piin ah Pathian caah ral a simi tampi an um. Pathian duhnak pakhat hmanh an zul lo. Thil ttha tuah pakhat hmanh an i tim lo. Sualnak tuah lawngte an duh. An tuahmi thil vialte hi Sehtan uar ci, Sehtan lawmh zawng lawngte an tuah. Cubantuk fa cu teh Pathian thluachuah a si nan ti ko hna hnga maw? Sehtan n ih remote control in man loin a ralkaap a ttuar termi an si.

4. KHRIH RAL ASIMI FALE HNA AN UM

Fale hi Pathian thluachuah an si dih ko ahcun ISIS i a lutmi mi tampi hna kha Khrihfa biakin hrawktu, Khrihfa hngawng cik tu lawngte an si ko kha nan theih ciomi an si. Kha hna kha teh Pathian pekmi thluachuah fale cu an si kho hna hnga maw?

5. BIBAL NIH ZEITINDAH MIN A SIK HNA

Baibal nihhin fa sual le thluachuah a si lomi fale auhnak min le sining min kha tampi a peek hna. Laak awk a tlak lomi, mi ttha lo (Phungthluakbia 6:12-16), mi hrawktu (Mikah 2: 1), rul fale (Joh. 8: 44), Tholung, cangcel, puanchia, miruamkai, mi depde a ti hna. Atam in a tam kho tuk. Ttial cawk ding khi a si lo. Cu bantuk minung cu Pathian nih nu le pa caah a peekmi thluachuah ah na chiah ko hna hnga maw? Psalm number pakhat nak khi zoh ulaw fale vialte hi Pathian peekmi thluachuah an si dih lo ning cu fiang tukin nan hmuh ko lai.

6. FALE CHEUKHAT KHA PATHIAN NIH ZEITINDAH A TI HNA

(a) Kain cu a nau a thah, a nu le a pa chan chung ngeihchia in a chiah hna caah mi zaam ah ai cang. Nu le pa sin in tthen a si. Chiatserh a si. (b) Noah chan i fale an ngeimi vialte hna cu Pathian nih tilian in a thah dih hna (c) Ismael cu tthawl a si (d) David lungteihnak a pe pengtu, a dotu, a fapa, Absolom cu thah a si. (e) Sodom mi hna cu khangh an si (f) A pa Noah a ihpitu Ham cu chiatserh a si. Hi fale vialte hi thluachuah fale an si ko nan ti ko rih hna maw? Chiatserhmi cu maw thluachuah cu an si hnga? Chiatserh cu na caah thluachuah a si kho hnga maw? Na pastor nih tluachuah an peek ah chiat maw an serh tawn le cucu thluachuah ah na ruah tawn? Na lung i fim!

7. LAIMI FALE HNA HI TEH

Laimi cu Khrihfa kan si caah kan fale vialte hi nu le pa caah, nu le pa sinah thluachuah kan si dih rua tiah kan ruah? Asi ah nu le pa na lomhter hna maw? Nu le pa na cawm hna maw? Nu le pa caah zeidah na tthathnemnak? Nu le pa caah lomhnak maw na chuahpi deuh ngeihchiatnak? Nu le pa nih an in cawmnak man maw a tam deuh, na bomhchannak hna? Nu le pa caah tthathnem teh nai tim kum maw? Na nu le na pa nih an in hrin i an in cawnken mi hi nu le pa caah amiaknak a um maw? “Thluachuah” timi cu kan caah thil ttha a chuah tertu khi thluachuah ti a si i nu le pa ca i tthatnak na chuahpi mi a um lo ah zeitindah thluachuah a si na ti khawh ne?

Pathian nih fale an kan peek ah khan nu le pa caah “thluachuah” si dingin peek kan si (Ps. 126). Asinain “thluachuah” dik an si nak hnga cawnpiak, fim chimh, zohkhenh rian kha kan ngei ve. “Fa ttha”, “fa fim” ah ser an herh. Cawnnak in ser hna lai. Pathian bia in kan ser hna lai. Cu ti i kan ser khawh hna lawnglawng ah Pathian nih fa, thluachuah, ca i a kan peekmi cu thuachuah an si kho. Fa tampi ngeih i nu le pa dawtu le zohkhenhtu zong a ngei lo i, nu le pa an tar tik i “tar umnak inn” hna i nu le pa a chiami fale cu Pathian peekmi thluchuah an si bal lo. Cucaah fa fim le fa ttha lawnglawng hi “thluachuah fa” cu an si. Fa sual, fa rureu, fa fir, fa that hmang kha thluachuah fa ti phung a si lo. Na fale hrintthan lomii hna hi Pathian thluachuah an si ne ah ziah Hell ahcun khangh cu an si ne lai?

Jesuh nih hrintthan lomi, khamh lo dingmi, hell i a tla dingmi, cu an chuah lo ah a ttha deuh tiah a ti!