Arti Virus A Tlung, Thinphang In Um Cio A Si

Arti Virus A Tlung, Thinphang Taktak In Um Cio A Si

=============================

Chinram ah Arti Virus a tlung ciammam i thinphang taktak in um cio a si caah Arti an i ting lo tiah theih a si. Arti nan ei lo ahcun nan thi lai,coronavirus zong Arti pumkhat einak ah adam tiin bia vakvai athang i Arti man zong akai dih ti a si.

Cu lawng siloin ramdang ummi an fale kha Phone an chonh hna i,Tuzan hrimhrim ah Arti na va ei lai , Zawtnak akhamh tiin an cbimh cio hna i Malaysia le ramthumnak ummi zong Arti virus nih aphak colh dih hna i, zokzok tein 12:00am atlin hlan ah Arti an va cawk cio tiah theih a si.

Arti kong hi hitihin a si>>Hi thawngpang a thanh tu a simi, Falam Nazareth Ngaktah cawmnak sianginn a ngei tu Pi Thuam Kip Tial nih ” Tuzing ah khan ngaktah kan cawm mi ngakchia pate hringtu a pa nih kan sianginn sayamah a ttuan lio mi Nukil cu phone in a rak chawnh i a chim mi cu kan khua ah ngakchia chuak ka te nih tulio zawtnak tihnung in luat nan duh ahcun tuchun suimilam 12:00 hlan ah Arti chumh mi pumkhat cio ei uh tiah a chim. Cu ruang ah kan umnak Naga khuami hna zong khuapi tein Arti cu an chumh hna i an ei cio hna. Cu caah nan ngaktah cawm mi ngakchia pawl zong an za tein Arti pum chumh mi cu rak pe cio hram hna uh ti in a chimh” tiah a fianter.

Thuam Kip Tial nih a peh rih mi cu “Cu kong cu a rannak in Letpanchaung i a um mi ka pa phone in ka chawnh i ka chimh chin ve hi a si. A hna a tthat tuk lo caah ka chim mi a fian lo zong a si kho. Hi kong hi Coronavirus timi he zeihmanh pehtlaihnak a ngei lo. Thawngpang dik lo a si ko. Ngaktah kan cawm mi hringtu a pa nih an kan chawnh zong ah hin Coronavirus kong hrim a chim lo i tulio zawtnak tihnung in luat nan duh ahcun ti vial lawng a si. Kapa phone ka hei chimh chin tthan tikah phundang pi in thawngpang a chuak i a si” tiah a chimchap.

Cu ruangah Chinmi kip sin Arti virus a tlung tinak a si. A taktak ahcun Tuluk ram in a ra mi Arti a ei tu cu a thi mi hmanh a um ti a si. Cu lio ah Arti pumkhat rinak ruangah Coronavirus  a dam khawh timi rak zumh ve cu kan mak lawlaw ko cang ….