Afghanistan Ral kongah US Officials Pawl Nih An Chim Duhlomi Pawl

Afghanistan Ral kongah US Officials Pawl Nih An Chim Duhlomi Pawl

=====================================================

(Kum 2001 in nihin tiang Afghanistan ramah US colcang ning biathli The Washington Post Newspaper nih a tialmi lehmi asi. Minutes 30 na caan pek in na rel ah cun theih hngalhnak hlawknak tampi an pek hrimhrim lai)

George W. Bush, Barack Obama le Donald Trump hna nih hin an dihlak tein biakamnak an tuahmi ai khat dih ko: Afghanishtan sersiam dingin US hi a cambual lai lo, ti a si.

Afghanistan sersiamnak kongah UN tu tuanvo ka lakter te ko lai, tiah 2001 October lio i US ralkap a kuat hna tlawmpal ah Bush nih a chim bal. Kum 8 a rauh hnu ah, a chawngtu Obama lila zong nih Afghanistan sersiamnak kongah kai sawhkalh lai lo, tiin a chim ve thiamthiam. Kum 8 bak a hung rauh hnu ah, Trump zong nih cu bang cun a ti ve thiamthiam.

Asinain, ral nih a chiatchuahtuk cangmi Afghanistan ram sersiam cu US nih ai tinhmi te a rak si ziar ai. 2001 thok tein khan, Afghanistan sersiamnak rian ca i Washington nih a hmanmi chawva a zat hi khawzei ram hmanh ah a hmang bal hrimhrim lo – innlo saknak, mihar bomhnak le Afghan ralkap thazang caah, tiin $133 billion bak a hman cang.

WWII hnu in, US nih Marshall Plan ai hman i, Western Europe lei i chawva a hmanmi vialte nakin a tam deuh. Marshall Plan bantuk in si ti lo in, Afghanistan sersiam an timh tikah hin cun a hramthok tein an chawva hman ning ai palh i, an tukmi ral nih dongh a thiam ti lo tikah, an i ruahnak nakin phaisa an hun dih chinchin, tiah US cozah riantuantu le ramdang ah an chiahmi minung le ralkap lutlai pawl le mihar bawmtu pawl nih an chim.

Daihnak le remthatnak chuahpi lehlam lo in, US ralkap thazang bochan lo awk thalo lakin Afghanistan cozah pi cu an hun derthawmter lehlam. Hi ti ningte a si ko rih ah cun, kum tampi chung dollar billion tampi bomh an hau ko rih lai, tiah US officials nih an chim.

Cohlan awk a tha ti lo mi khahlan Afghanistan a sining kha khirhter riangmang in central democracy phung an serpiak hna i, free-market economy kutka onpiak cu Washington nih ai tim peng. Cu kongkau cu mipi sin thanh lo dingin kham ai timh pengmi a si. Cu tikah, Afghan nih a tawlrel khawh lo leng tiangin a tammi phaisa tom cu Congress le White House nih cheh hnawh a timh hna. Obama chan ah khan US ralkap milu 100,000 bak ral ram ah chiahchap an hung si.

“Cu bangin a hunghung in a ralkap a thlah hna tikah, Afghanistan ah minung le chawva cu a hunghung in an lut. Zei he dah ai lawh ti ah cun, tipep chung i ti a hunghung in hun rawn he ai lo. Caktuk in na rawn a si ah cun, na rawnmi ti kha a pep lenglei tiang a chuak dih lai i, vawlei ah tampi a vaivuan ko lai. Cucaah, vawlei ro tu kha heh tiah ciap lakin kan toih ko ne hi!” tiah USAID ah official a rak si bal mi David Marsden nih a chim.

Khat lei in tah ve tikah cun, 2001 hnu in khan Afghan ah khua a sami hna hi ningcang a panhmi an tam ngai ve ko e. Hngakchia thih le loh a zor ngaingai. Hngakchia sianginn kai an karh ngaingai. Afghan a chawhlehthalnak a thancho, ti awk in a hung um. Asinain, US nih an ram sersiampiak a timhnak rian nih hin a chiatchuahpi mi thil tampi a um ve. US bomhnak tel lo in hin hlah maw Afghanistan hi a that deuh lemlam lai, ti tiangin khua a ruatmi mihar bawmtu phu tampi an um ve.

Hi kong an tialmi capar hi zapi rel awkin a um cang. Phaisa cu kan hman lengluang ko nain, kan chuahpimi thathnemnak belte langhter ding a um huaha lo, tiah San Diego ah a ummi University of California ah economist le Afghanistan kong a theitu Michael Callen nih a chim. Kumpi kum 18 chung nolhcip in an i palhmi hi a si a si lo mi thil a si. A tlacop in khuakhan, pingpang lo in policy ser, nawlngeitu lakah alhnialnak um peng. Phaisa nih zeizong vialte a remh te ko lai, tiin ruahnak a bimi hmangin ram pakhat sersiam an i timh caah mitampi nih an thangchiat cang hna.

US lei nih an thawhmi phaisa a tamdeuh cu faktuk in man an phalhmi puaisa le eihmuar a hmangmi Afghan cozah lutlai pawl an zal chungah ai khumh dih ko hme cu. US nih sersiam dingah ai hmaithlakmi sianginn, sizung le lam pawl vialte tetferhfurh le tlu rengruang in an ril ko hna.

A phichuak cu hmuh chung khawh a si ko cang. Kum sawm tampi chung US ralkap nih ramdang cungah ai thlakmi kong zoh tikah ai fiang ko – Iraq, Syria, Libya, Yemen, Haiti, Somalia. Ral tuk piak hna hnu i an ram sersiamnak kongkau i a herhmi timhlamhnak hi kan i ngeih rua lo. Hi bantuk i ral kan tukmi ai lim le cangka, kan tuah thiam tawk tham cu, “khah zeidah kan tuah ah a than cang lai” hei ti khin kan i lak. Lakhruak in khin kan cawlcang. Cucaah, cuhlan bantukin kan tuah peng ko rih a si ah cun, hi hnu hmailei zongah thadeuh in kan tuah khawh lai cu ka zum kho bak ti lo, tiah Bush chan lio i White House national security adviser a rak si bal Stephen Hadley nih piangtlar in a chim.

“Afghanistan i khua le ram sersiamnak kong i an timhlamh mi vialte cu a thatnak lei in ca in an chuah dih, asinain a chunglei biathup zoh tikah ai palh mi thil tamtuk a um. Si ko e, khuacan ah cun duhnak nakin chawva kan hman deuh sual can zong a um phung a si ko. Ram rum kan si bangin, khur chungah kan phaisa cu a bungh in kan hun bungh can a um ko lai e, asinain, cuhlan ah cun a khurka lenglei tiangtiang in pawt dingin cun kan phaisa kan toih bal theng lo dawkaw. Cucaah, hi bantuk chawva sawksamnak kongah a sining deuh tein kan tuaktan awk a si hnga lo maw? Kan tuah khawhmi a si ko hnga lo maw?” tiin 2007-2013 tiang Afghan ral kongah White House ah tuanvo a ngeitu Douglas Lute nih a chim.

Rian kan tuan ngaingai ko, ti langhter duh in US nih Afghanistan ah meitha laknak tikham le mawtaw lampi ngan taktak pawl an sikpiak hna. Cu pawl cu, vawlei cungah ca a thiam lo bikmi Afghan misifak pawl nih cun zeitindah an thlopbul khawh rua hnga. Pathian nih a chuaktak cangmi khua pakhat ah US nih a limpiak mi rian pakhat kongah onnak an tuah i ribbon (phecu) an tan lio ah kai tel ve. Police sakhan cu kan US army corps of engineer nih thlalang an benhpiak hna i tleuzur in an sakpiak hna. An police bawipa nih a kutka a on a thiam lo, US nih an serpiakmi kutka bantuk a hmuh bal lo caah a si. Cu thil ka hmuhmi nih cun Afghanistan pumpi a cangmi thil sining ka mitthlam in ka cuanh khawh colh, tiah Lute nih a chim.

Afghan ral ai thok le cangka, US officials pawl khat le khat al an i thok colh, khat le khat an i thangchiat, a bikin Afghan ram sersiamnak kongah hin a si khun. 2008 lio ah khan phaisa ningcang lo in hman a simi kongah thawngpang theih a si tikah, phaisa hman ning cang ngiathlai dingin Congress nih phu pakhat a thlah. Cu ni thok in cun, Office of the Special Inspector General for Afghanistan Reconstruction (SIGAR) nih cun 1,000 audits le bihzohnak an tuah i, an sawksammi phaisa cu an hun rengh ve ciammam hna i, dollar 2 billion bak sawksam cazin ah ai tel. 2014 ah khan “Lessons Learned” timi tlangtar hmangin Afghan i ningcang lo in hmanmi policy remhsiamnak caah, tiin SIGAR nih $11 million phaisa thazang an hman. Raltuknak ah avoikhatnak ai telmi hna minung 600 lenglo cu interview an tuah hna.

Ram sersiamnak kong he pehtlai in SIGAR nih cun thawngzamhnak pahnih an tuah. Asinain, interviews lio i a biapibik in an chimmi a tamdeuh cu an langhter duh lo, hranhram in an hrelhpiak hna. US cozah nih ramdang sinah dairek in phaisa a kuat hna tikah, midang bochan nunziaza thlalo a cawnpiak hna bantuk khi a si tawn. Culawng a si lo, US cozah minung le ralkap agencies karlak an i pahtlaihnak thitha in a um lo mi ruang ko ah hin an i tinhmi rian hi a chiatchuah tawnnak hi a si khun, tiah April 2018 lio i thawng an thanhmi ah an langhter.

Afghan hi a tunak in cakdeuh in kan sersiam a hau lai, tiin Bush cozah sinah ca ka kuat mi kha an ka hnonpiak diam, tiin 2002-2003 i Afghanistan ah US ambassador a tuanmi Robert Finn a chim.

Hi zawnte hi kan cozah i a chamhbaunak a si. A ra lai mi election kong dah ti lo cu zeidang ruah khawhmi kan ngei ti lo. Afghanistan kan va phak tikah, kum hnih maw kum thum lawng dek kan rau ko la cuh, tiin a mikip nih an chim. Kan van a va thattuk dah ti lo ah cun, Afghan ah hin kum 20 zong kan cambual kho ko dawkaw, ka ti tawn hna. Kan ram uktu bawibik pathum hna lakah Bush hi ram a sersiam lo bikmi cu a ko lai. President campaign a tuah lio ah khan, Somalia le Haiti sersiamnak kongah chamhbaunak a ngeimi Clinton cozah kha heh tiah a rak thangchiat bal. Ram sersiamnak, tiin tlang an aupi lenmi rian kongah kan ralkap pawl hi tunu te bang hman rai an si lo, tiah ka ruah. Kan ralkap pawl hi raltu ding le teitu tu ah hman deuh ding an si, tiin 2000 lio i Democratic nominee a si mi Al Gore nih a chim.

Kum khat hnu ah Afghan tu dingin Bush nih US forces cu nawl a hun pek hna. Khulrang tein ralram ah buan an hun co taktak. Raltuk ai lim hnu rian hi ruahnak nakin a rau deuh te lai, ti cu ruahcia a si. Afghanistan nakin sersiam a haumi ram an um hraw ti lo. An si nih fak chuahchuah. 1979 i Soviet Union nih a rak lak tok tein khan raltuk lawng an rian. Vawleipi a sining a theitu hi an tam lo. A tamdeuh hi cu cathiam lo lawngte an si. An ram ah nawl a ngei taktakmi, biaknak phung ai tlaih i chanthar thanconak a si mi TV, ringawn tumnak paohpaoh, nunau pawl nih pa bantukin nuhrin covo ruang khat in ngeihter, hei ti bantuk a khamtu Taliban misual pawl an rialdit hna.

Siangpahrang hi nawlngeibik a si peng ko, tiin a ruat peng rih mi. Russia asiloah Amerianmi an um, ti awk zong a thei lo mi pawl an tam. A cheu cu phaisa zong an hmang lo, thil le ri i thlennawn chomin thil ai caw mi an um. Kum zabu 21 chan chungah chan dangpi chung i khua a sami an si, tiah USAIH caah Afhgan ah saupi a tuanmi Jordan Sellman nih a chim.

Bush biachim cu an cinken caah, Bush cozah nih cun Afhgan sersiamnak rian cu a hun hrial zuahmah. Minung hawi bomhnak le khua le ram sersiamnak rian cu UN le NATO nih tuanvo lak dingin a hun hnursuan hna. US nih Afghan ralkap tlawmte cu training pek ai thok, asinain tampi lak a duh hna lo, a ruang cu nehhnu ah an kan leoheutertuk sual lai, ti Pentagon le State Department nih a phan caah a si. Asinain, Bush cozah nih cun a um kho ve ti lo i, economy a hram tal hun domhpiak dingin ai tim. Free markets kongah Afghan hi a thiam ngai cang ko nain, American cawlcangh ning tu zul deuh dingin US nih a hnek.

Asinain, Afghan uktuk tam deuh hi cu thlen le nawn ai tim lo bantuk an si peng ko rih. Communist sianginn ah an kai hna. Capitalism hi nan cohlanpiak hna a si ah cun, private company pawl an hung lut la le anmah miaknak lawng an tuah ko lai, tiin an i cawnpiak hna, tiah Finn nih a chim.

Afhgan hi 1978 – 1992 tiang communists nih an ukmi a si caah, cozah nih cun cun socialist asiloah communist uknak hi an duh deuh peng mi a si, tiah National Endowment for Democracy kongah senior program officer a si balmi Richard Kraemer nih a chim. Kanmah US official zong hi kan i hleih ve lem lo. Duhsaknak tha cu kan ngei dih cio ko e. Asinain kan mah duhnak lawng kan ruattuk tawn. Afghan nih a herh taktakmi free market system hun cohlanpiak kan duh lo, tiin Kraemer nih a chim.

Economic he pehtlai in cun, US nih hin Afghan hi cawnnak ah hman sehlaw a dawh. Fak deuh in an ruahpiak hna awk a si, tiah mi tamdeuh nih an hmuhning an chim. Afghan mipi tamdeuh hi cu lothlo an si i degree a lami an fanau le rian pek kho ngaingai an tam lo zongah, an ram fimcawnnak tu ah hin phaisa hi tamdeuh in hman awk a si.

Chuahtakmi sianginn pawng te ah sianginn thar kan hei sak. Suallam a ngei lo hme cu aw. An duhmi hi sianginn a si lo, an fale hi muheh congh rian in chanh an duh hna. US le European officials pawl nih cun free trade tuah hna seh, ti an duh. Asinain, an ram chuak zei a um lo. Zei cu hme kan zuar la? Misur pelpawi te hi maw kan zuar kun lai? tiin Afghan official nih March 2017 ah khan a chim bal.

Sifahnak dirhmun in duhsak tein chan khawhnak dingah cun, thilman uk khawh ning le cozah bomhnak tete hna hi sersiampiak an hau. Cu pawl cu US officials nih an hmuhpiak kho hna lo, tiah UN le State Deparment ah advisor a si balmi Barnett Rubin nih a chim. Bomhchanhnak tel lo in chawlehnak thatein a kal kho ko, tiin ruahnak chuah cu ram thangcho cuahmahmi caah cun tawnchommi bia menmen a si. Ram pakhat thancho a tlolh nak a ruang bik cu cozah nih a duhthimnak ai palh ruangah a si tawn. An ram remhsiamnak dingah hin Ivy League i polical scientist pawl an herh lem lo. Ral lawng ai tumi miphun, tei khawh lo mi ralhrang, bawi pawl an thutdanh in thumh le thah ai tim zungzalmi le ram chungah ral a tho pengmi ram a si.

America nih an sermi phung zulh in Afghan ah democracy cu an dirh i polular vote in president cu Bush cozah nih a thimter. Zeimaw zawn ah cun Washington cawlcangh in a cawlcang ve tawn. Khualipi Kabul ah thazang an khuar i, dollar in an hram an i cawhvuat riangmang i Western ram in a rami chimcheutu thatha he cun a kil kip in khua an khang. American cawnpiaknak tang te ah cun Afghan cu khua a vung sa i, ruahnak thar le hmanrua thar cu a hun i hman. PowerPoint an hun i hman i presentation hna an hun tuah cutmat ve cang, an i tinhmi an langhter, stakeholder meeting hna an hun tuah, cun appointment calendar hna nithla an hun tuk vurmar khawh ve cang. Asinain, thil pakhat a um ve rih mi cu, Afghan president cu parliament le judiciary pawl cungah nawl faktin in a hun ngei cang. Cu tikah peng le tlang uktuk hna cu amah duh in a hun thiah duahmah colh hna. A tawinak in chim ah cun, nawlngeihnak vialte cu minung khat kut chungah a hun phan.

US nih an ronhmi hna system le hlanlio phung an i ngeih mi cu an hun fonh. American pawl nih cun teinak a co bantukin kan i hmu. Kan i palh bikmi cu, nawlngeihnak hi a laihlum te lawng ah kan chiahpiak mi hna hi a si, tiah min langhter a duh lo mi European Union official a si mi Germany pa nih a chim. Taliban pawl an sungh le cangka Afhgan ah president kan herh colh, tiin kan ti. Asinain cucu ai palh bak. American style in president tuanter ah cun a tha ko lai, tiin State Deparment nih a ruahmi hi ai palh cikcek. Ramdang ah American phung hi san a tlaih lem lo hi an thei kho lo. Centralization uknak a hman bal lo mi ram ah zeiruangah dah centralization phung cu kan ser? tiin a chim.

A ruang bik cu, US hruaitu hna thinlung ah hin Afghan caah hruaitu a si kho dingmi an lung in a um cang caah a si. Anih hi southern Afghanistan i miphun pakhat hruaitu a si i a min ah Hamid Karzai a si. Hi miphun hi an ram ah a nganbikmi miphun a si – Pashtuns miphun a si. Karzai hi mirangholh a nal bak i, CIA nih an bomchanhmi pa a si. 2001 ah khan US spy nih a nunnak an khamh bal i, CIA nih kum tamial hman dingin phaisa zong an pekmi a si.

A hramthok ah cun, an duh ningin Karzai nih a hruai ko. 2004 i interim in a tuan lio ah Karzai cu Afghan ram i a hmasabik democratic president ah thim a hung si. Bush he pumpak hrimhrim hawikomhnak a hun ser i, hruaitu pahnih hna cu videoconference in khat le khat an i chat lengmang tawn.

Asinain an i pehtlaihnak cu duhsak in a hun tiahmal i, US ralkap nih zanhlan in vanlawngin ka mipi tamtuk a thah hna, tiah Karzai nih thangchiat hram a hun thok hna. Karzai nih cun ralhrang pawl biakamnak a tuahmi vialte a hun tuah than tikah cun US cu a cungah ai nuam ti lo. 2005 hnu in khan ralhrang pawl cu an hun kir than zeicahtiah an sinin bomhnak Karzai nih a duh than caah a si. Karzai hi US nih democracy a zorh kho lo, zeitik hmanhah democratic phung zong a duh bal fawn lo.

Karzai tham cu a hawile pawl lawng pei ai bochan ko hna cu. Cucu Afghan nih a tuah tawnmi te a si ko. A hawile le a tanhtu le ramchung bawmchantu ai bochan zungzal. Nawlngeihnak a kut ah ai kenmi a va um hmanh ah, cu nawlngeihnak cu American nih an pekmi nawlngeihnak a si lai lo. Amahtein ai sermi a si te lai, tiah Bush chan lio i State Department ah chief spokesman a si i, nehnu ah South Asia ah top diplomat a si mi Richard Boucher nih a chim.

Hi phung hi hun hmang te hrimhrim aw, tiin US nih kan chiahpiakmi phung le lam hi a caah cun zulh a hartuk mi a thil a si. America hi kan tuah ning bantuk tein hi phung le lam hi vun i hman law hun tuah ve aw, tiin kan chimh salam. 2009 ah khan Karzai nih teinak a hmuh than. Ningcang lo duh in a hmuhmi a si tikah US officials tampi cu an lau i, dothlatnak tuah dingin kar an hlang. US nih Afghan kan nawlngeihnak sangbik hi hnursuan i ka ngawlngeihnak in thumh nan ka timh, tiah Karzai nih Obama cozah cu a rak thangchiat lehlam.

A donghnak ah cun, US officials pawl nih an thin an hun i thimh than. Ram thar cu an hun dirh i, Karzai cu nawlngeitu ah an hun chiah. A nawlnolh thim a si zarh tlawmpal a rauh ah khin, Taliban pawl tei dingah le Afghan thawnter awkah ralkap 30,000 ka thlah chap lai, tiah Obama nih thawng a hun thanh colh. Asinain, 2009 December i West Point, New York i US Military Academy ah biachimnak a ngeih lio belte ah cun, cu ti ralkap a vung thlah mi cu kum 8 chung can a la cangmi an ram sersiamnak rian he ai pehtlai lem lo, tiin a chim than.

Kan ralkap ral an tuhmi hi mak zau dingin a cheu nih an duhnak an langhter. Ram pakhat sersiam hi kum 10 chung a rau kho ko e. Asinain, kei nih ka duh cem mi cu kan ram sersiam hi a si, tiah Obama nih a chim.

US nih hin Afghan ah ram sersiamnak rian a tuan maw tuan lo, tiin 2010 June thla i Capitol Hill ah Army Gen. David H. PEtraeus nih biachimnak a ngeih lio ah dingteu tein an hal bal. Kan ngei ko. Hi kong hi chim duh lo phun le, hi kongah biafak chim zong kai tim lo, tiin a leh hna. Obama nih ai tinh ve ningah cun Afghan hi cak taktak in thanchoter i, a herh ningin US chawva zong hman ai tim.

Karzai cozah nih a mipi a kilven khawh hna i a herhmi rian tete a pek khawh hna ah cun, mipi nih Taliban sinin bomhnak an la ti lai lo, tiin Petraeus le a dang US ralbawi pawl nih zumhnak an rak ngei. Asinain, dawnkhantu thil ngan taktak pahnih a um.

Pakhatnak ah, khualrang tein thanchoter nak dingah can nih a zo hna lo. Ralkap pawl US kirter dingah Obama nih Pentagon hi thla 18 chung lawng can a pek hna.

Pahnihnak ah, Afghan ram pumpi cul in rian a tuanmi cozah minung an um tawk lo. A ummi hnih khat hmanh cu eihmuar lawng an rian i, mipi nih an huat fawn hna.

Cu tikah, Afghan cozah cu a ran khawh chung rang in sersiam dingin Obama nih ralkap siseh, State Department siseh, USAID siseh nawl a hun pek hna. Mimi an lung lak khawhnak ding lam a si mi paoh cu – sianginn siseh, sizung siseh, lam siseh, heh tiah cozah minung le riantuantu contractors pawl cu an thlah hna. Petraeus a kalnak paoh ah cun phaisa cu a tomtom in bunh a si ko. Afghan pawl rian tuan hna seh ti a duh hna. Cu tikah, bawi pawl bia an i hal tawnmi cu “Zeituak dah ral na tei cang?” ti si lo in “Phaisa zeituak dah na hman cang?” ti a si. Dragon kan dawi peng ko hme cu..a hnung lawngah kan i tlai peng. A za cang ti a um bal lo, tiah USAID official pakhat nih a chim.

US nih karhlannak a tuahmi hi ai ningcang lo i, sau a daih ding zong a si lo. Kum a zaza in hnung a tolh cangmi ram pakhat hi kum tawmte chungah a khupthal leh ding cu a hartuk mi thil a si, tiah aid worker pakhat nih a chim. A min langhter belte a duh lo.

Chawva a hunghung in hman dingin nawlpek kan si. Obama nih nawl a chuah ko cang nain, 2011 in khan cun cu a nawlchuahmi cu US ralkap lei nih hun thlenpiak lo awk kan tha ti lo, tiah ralbawi Petraeus nih a chim.

Can an kan pekmi a tawituk ti kan hngalh caah, hlawhtlinnak hmuh duh ah chawva cu a bungh bakin kan bungh a hau ko. Kan riantuannak duhning in a cak lo, ti kan hmuh le cangka heh tiah phaisa thazang in kan tuah colh tawn. Cu bangin tonghmang lo in phaisa hman a si tikah, a karlak ah kan vaivonhmi a tam lengluang ve, tiah a chim.

2009 – 2010 tiang Southern Afghan i economic thanternak rian a kuritu hi Navy Reserve officer Tim Graczewski a si. 37-acre a kaumi hmun ah rian ka thok lai, tiin interview a tuahtu hna sinah a chim ko nain, a tak in a cun a tuah mi a um fawn lo. Tim a phak hlan tein khan, 48 business rian caah, tiin Kandahar pawngah sehzung hmunpi ser dingin US cozah nih $8 million thap in minsen a thut. Asinain, a hung phak tikah cun a zei neh le nang hmanh a hmu lo.

Hi sehzung hmunpi sak dingin ceihhmainak kan ngeih lio ah khan zeihmanh a ruahkhah awk kan theih lo mi ka ruah tikah a lau bak in ka lau ko. Sehzung inn pawl khoika an sak le an dirh, timi thawngpang siseh, a muisam siseh, a pelte hmanh hmuh awk in a um lo. Hi kong hi a hmun a ummi nih a theih hrim an thei hraw lo.

A donghnak ah cun innhmun an cawkmi ah cun ka vung phan ko nain, inn pakhat hmanh a um lo – lam le sul le pep a cheukhat lawng an ral um. Aho nih a chiahmi a si ka hngal lo. Cucaah thilri tete cu kan hman top. Asinain, 2010 i Afghan ka chuahtak hnu khan cun cu sehzung program pi zong cu a lotlau colh ve ko, tiah Tim nih a chim.

Cu hmun cu kum 4 a rauh hnu ah US auditors pawl nih an vung pal, chuahtakmi a si kha an vung hmuh. Company pakhat te a um, cun ice cream sernak pakhat lawng an rak um. Cu in cun US cozah nih cun Afghan ah a nganbik pahnihnak khualipi a si mi Kandahar le a khua innpa pawl electric mei peknak dingah cu hmun cu an hman beh.

Kandahar nih hin cuhlan ah cun meitha hi sumren ngai in a hman tawn. Cu te cu US ralkap bawi pawl nih cantha an ruah ve. Meitha tlamtling tein kan pek khawh hna a si ah cun, Afghan cozah an dirpi lai i, Taliban pawl an hun doti cang lai, tiin ruahchannak an ngei. Cu ti meitha hun peknak dingah cun, Kandahar in meng 100 hrawngah a ummi Kajaki Dam cu hun tuahtamh an i tim. 1950 lio ah khan USAID nih a rak sakpiak mi hna a si i, 1970 ah khan a remhpiak than hna. Asinain cu dam cu a rauhhlan ah ai rawk colh.

2004 hnu khan heh tiah US nih an rian cu an tuan sek ko nain, cu ti ngaingai in cun santlaihnak an hluhchuah kho lo. Dam a velcheh hrawnghrang le transmission lines vialte cu Taliban nih an uk dih caah, dam lei vung kal dingah cun ralkap thazang hman, asiloah helicopters bak in kal hau a si fawn. Cutluk cun dam remhsiamnak rian cu tih a nung ko nain, 2010 in khan US ralbawi pawl nih cun dollar million a zaza hmangin rian cu an kalpi chih. Hi rian hi an ram sersiamnak ding caah a biapi bak mi a si, tiin an ti.

Ralhrang pawl umnak hmun le hma ah hi tluk a liannganmi project dirh cu sullam a ngei lo, tiin a cheukhat mifimthiam pawl nih an al hna. Cun, a thlopbul zia zong an thiam fawn lai lo. Cu pinah, electric mei hmang lo in can saupi khua a sa cangmi Afghans mipi an thinlung le ruahnak cu hi project nih hin a la kho taktak lai maw? tiah an ti.

“Mei a thathnemnak a pelpawi te hmanh a thei fiang kho lo mi Kandahar mipi lungthin lak riangmang in Taliban pawl ralsa ah hun chiahter cu a si kho ngai hnga maw?” tiah USAID official nih a chim.

A donghnak ah cun, biaalnak ah ralbawi pawl nih buan an hun co. Hi tikham (dam) caah phaisa kan sawksam ngaingai. Asinain, a thathnemnak cu a um pah ve ko e, tiah cu lio i Afghan ah US ambassador a tuanmi Ryan Crocker nih a chim.

Biachahnak cu ka tuah ko e, asinain sai a tlaih lai cu ka zum lem lo. Lungfim ka cawnmi vialte lakah a nganbik mi cu, Afghan ah hin rian ngantukmi chuahpi lo ding, ti hi a si ko, tiah Ryan nih a chim.

Ralbawi pawl ca belte ah cun tikham rian lawng hi ai za lo. Remhsiamnak rian hi kum tampi a rau lai i, ram sersiamnak dingah a nithla an tukpiak mi nih le a dingdeng chinchin cang. Cop le cilh in Kandahar mipi sinah meitha pek an duh colh tung. Cu tikah, a kum kum in rau hau lo tin, diesel in monghmi meiseh tu cawk dingin timhlamhnak an ngei.

Cu meiseh ca i ramdang in phaisa bawmtu (donors) nih an kuatmi phaisa vialte tlaitu dingah NATO official pakhat an fial, asinain karhlannak an tuah kho ruam lo. “Hi kan rian hi feldeuh tein nan zoh ah cun sullam a ngeih lo zia nan pemh ko lai. World Bank kan fuh hna, a tongh zong an duh lo. Mipi an hun zoh i, molhtamh bia ah an kan chiahpiak salam” tiah NATO official nih a chim.

Meiseh cawk ding kongah khahlan US ambassador nih a duhlonak a langhter ko nain, ralbawi pawl theu nih cun buan an co kanh than. Iraq lio ah khan ralbawi Petraeus nih mipi kut ah meitha a pek khawh bal caah, Afghan zongah cu bangin tuahpiak ai tim than. Asinain Iraq ah khan cun a sul le a lam a um deuh ngaingai. Zinan, engineer le ramchung thazang tampi an i ngeih. Cu tikah meitha lak than khawhnak lam a um.

2018 December tiang i Afghanistan dam le meiseh le a dangdang meitha ca i an herhhaimi ca i US cozah nih phaisa a hmanmi hi $775 million a phan cang, tiah SIGAR audit nih a langhter. Tikham i an hmanmi meiseh cu a letthum in an tuat ko nain, i nincanlonak tete a um peng ko rih. Nikum tiang ah khan cun, Kandahar ca i meitha hi zuarchin awk tlak dirhmun a phanh lo pinah, ramdang bomhnak tel lo in cun a rian a tuan kho ding a si lo, tiah USAID nih a chim.

Hi bantuk projects pipi nih hin kan i tinhmi – daihnak le remnak – chuahpi a tlolh. Cun, US ralbawi pawl hi an khai khawh leng tiangin savo an i tuh, tiah Bush le Obama chan ah Navy SEAL le White House official a rak tuan bal mi Jeffrey Eggers nih a chim.

Hi kongah biahalnak a um mi cu – zeiruangah dah US nih hin a ti khawh lo tiangin tuanvo hi lak ai timh? Hi biahalnak hi kan i hmanmi ning le cang (strategy) le minung hna kan lungput he ai pehtlai i, a phi hun pek awk ah a har ngaimi thil a si, tiah Eggers nih a chim.

Ram sersiamnak rian pi hi sairang lawng nih a hrawh a si lo. Chaw le va thitha in an tawlrel khawh lo nak a ruang pakhat a um rih mi cu Commanders’ Emergency Response Program (CERP) ruangah a si, tiah Lessons Learned le SIGAR nih an chim. US ralbawi pawl cu Congress nih nawl a pek ciammam hna le, ning le cang tein puaisa he riantuannak phung le phai vialte cu an hun hnonpiak hna i, lam le sul sernak ah $ 1millon tiang an hun hman. A taktak ah cun a tam u cu $50,000 nak tlawm a dihmi lam le sul lawngte an si hna. Deiretchanhtuk kan si caah, khahlan i CERP nih an i hmanmi phung le phai kha kan i hman ve. Cu ti an phung kan i hman ah cun nehhnu hmailei ah ahohmanh nih an kan cekhlat ngam lai lo, ti kan i ruahchan caah a si, tiah US ralbawi lei nih an chim.

Sizung saknak kong report tuah ciami i hmathlak vialte khi hun zoh u law ai khat peng ko lai, tiah Kabul i headquartes ah ralbawi pakhat nih a chim. Iraq lio i CERP nih capar in an duhmi an hal fatinte “sheikh” timi Arabic ca an tial. A sullam cu “upatmi dirhmun” ti a si. Cu tikah, Afghan zongah hin Iraq lio i CERP nih an cawlcanghnak bantuk kha kan i hman ve lo ah cun, zeihmanh kan chuahpi kho lai lo, tiin ralbawi pawl lungput a hung um.

Phaisa a hunghung in kan hmanmi hi bing (cocaine) bantuk a si. Kan agency pawl a ritter viar cang hna, tiah Afghan nichuah lei Khost pengkulh ah Army National Guard general a si mi Brain Copes nih a chim. Hmun khat ka vung phan i, $30,000 dih in US nih kan sakmi greenhouse pi cu khuami nih an thlopbul lo caah, tlu rengtung in a um. Ka ralkap pawl nih cun thirhri kan cawk i, kan hun remh. $55 lawng kan dih, a that zong a that deuh fawn.

Hman awk ah pei phaisa cu Congress nih a kan pek fam cu. Cun hmang dih hna seh, ti zong an kan duhpiak cu teh. Phasa na hman paoh a si ah cun, zeithei na tuah kha biapi a si ti lo, ti lungput kan ngei dih, tiah Copes nih a chim. CERP kut ah US cozah nih a apmi phaisa hi $3.7 billion a si i, US ralbawi pawl nih heh tiah an hman len ko nain, cheuthum ah cheuhnih lawng an hman khawh. $2.3 billion tiang a hman bak ve. Cu vialte lakah Pentagon nih cazin in a fenh khawhmi phaisa hmanzat cu $890 million lawng a si, tiah 2015 audit nih a langhter.

An sawksammi le thitha in an tawlrel khawhlo kongah zapi cu an lau dih. CERP hi zei hmanh an tuah mi a um lo, phaisa kam ah an i hel sawhsawh le si, tiah 2011 – 2014 tiangah Afghan ah USAID mission director a si mi Ken Yamashita nih a chim.

Tuanvo laknak a pelte hmanh um lo in hman cawklo phaisa cu khur chungah an thlak bantuk a si ko hme cu, tiah NATO official pakhat nih a chim.

Afghan ram sersiam dingah ningcang lo in phaisa an sawksam lawng si lo in, an tukmi ral khom hi an tei setset maw tei setset lo dah, ti hmanh hi US ralbawi pawl an i fiang ti lai lo dah. CERP projects pawl hi dirh le sak taktak an si le si lo hmanh an nehnang zawt a har ngaingai, tiah Kabul ah a ummi US ralkap headquarters ah rian an fialmi Army officer nih a chim.

X project nih kan duhning tein theipar a chuah ko, ti a kan chim kho tu thil tuaktannak kan herh. Asinain cu bantuk thil tuaktannak cu kan fiang fawn lo. A tu i a ummi sizung pawl nih Taliban pawl zeitluk in a bomh ti hna lo, ti zong kan fiang kho ti lo. Kan umnak hmun in 10 yards hrawng lawng ai hlatnak ah a ummi thil sining kha kan theifiang kho tawn lo, tiah a chim.

Si kho seh, tin duhsaknak nganpi kan ngeihpiakmi project ngan pipi hmanh hi khing a kan rihter than tu thil an si kho ko dawkaw. Voikhat cu ngandamnak kong he pehtlaiin, US aid workers pawl an ra i, kan mipi hna cu kuttawl ning le cang an hung cawnpiak hna. Mipi caah cun nehsawh le thlanglamh bia a si. Thlacam hlan ah nikhat ah voi 5 a kut ai tawl pengmi miphun an si. Culawng hlah, kuttawl project tuktak cu kan herh tung lo. Rianhmuhnak kong, cun hmuhchuahmi an ngeih khawhnak kong pei nan ruah deuh awk a si cu, tiah 2008 – 2014 tiang Kandahar pengkulh uktu Tooraylai Wesa nih a chim.

Asinain cu zong nih cun a kan dironh khawh than mi a si. Pep a bunhtu pawl cu US le Canadian ralkap nih thla khat ah $90 in 100 an pek hna. Asinain, cu lio ah cun sianginn cachimtu pawl cu thla khat ah 60 in 8 hrawng lawng an rak hmu.

Cu in cun sianginn cachim pawl cu an rian an kaltak i, pep bunh dingah khuar chawh an thok cio cang hna, tiah 2009 in 2010 tiang Canadian pawl caah adviser a tuanmi Johnson nih a chim.

Afghan nichuah lei zongah gung-ho ralbawi pakhat nih sianginn 50 sakpiak dingin bia a kamh hna. Asinain, a donghnak a phi chuak cu, Taliban a bomh hna bantuk ah ai cang diam ai.

Cachimtu ding an i za ti lo, inn lawng lawngkaro pi in an dir ko hna. Cu tikah a cheukhat sianginn pawl cu Taliban pawl bom sernak zung ah an i cang hna, tiah US ralkap bawi pakhat nih a chim.

Chelsea Bawi